اسلام آباد میں بارش کے باعث خنکی میں اضافہ ہوگیا ،محکمہ موسمیات کا کہنا ہے اسلام آباد میں آج مطلع جزوی ابرآلود رہنے کا امکان ہے۔
دوسری جانب ہری پور اور گردو نواح میں بھی موسلاد ھار بارش اور ژالہ باری ہوئی،بارش اور ژالہ باری سے سردی کی شدت میں اضافہ ہوگیا۔
اس کے علاوہ بالاکوٹ وادی کاغان کے مختلف علاقوں میں بھی بارش و پہاڑوں پر برفباری ہوئی،وادی نیلم کے سیاحتی مقام رتی گلی میں برفباری کا سلسلہ جاری ہے۔
برفباری کے باعث رتی گلی جھیل اور گردونواح میں ہر سو سفیدی چھا گئی،برفباری دیکھنے رتی گلی جھیل کے بیس کیمپ پر سیاحوں کی آمد جاری ہے۔
سیاحتی مقامات بابون ،پتلیاں جھیل ،چٹا کٹھا جھیل ،شونٹر ویلی میں برفباری جاری ہے،برفباری کے باعث سیاحتی مقامات کے سرمائی نظاروں نے علاقے کی خوبصورتی میں مزید اضافہ کر دیا۔
حکام نے بارش اور برفباری کے دوران سیاحوں اور مقامی افراد کوسفر کے دوران احتیاطی تدابیر اختیار کرنے کی ہدایات جاری کر دی ہیں۔
