پشاور کے علاقے حسن خیل میں سکیورٹی فورسز کے انٹیلی جنس بیسڈ آپریشن کے دوران کیپٹن سمیت 2 جوان شہید اور 5 دہشتگرد ہلاک ہو گئے۔
آئی ایس پی آر کے مطابق سکیورٹی فورسز نے دہشتگردوں کے ٹھکانے کو مؤثر انداز میں تلاش کیا، فائرنگ کے تبادلے میں 5 دہشتگرد ہلاک اور تین زخمی ہو گئے جبکہ کیپٹن حسین جہانگیر اور حوالدار شفیق اللّٰہ نے جام شہادت نوش کیا۔
آئی ایس پی آر کے مطابق 25 سالہ کیپٹن حسین جہانگیر آپریشن کی قیادت کر رہے تھے، ان کا تعلق رحیم یار خان سے ہے جبکہ 36 سالہ حوالدار شفیق اللّٰہ کا تعلق کرک سے ہے۔
آئی ایس پی آر نے بتایا کہ سکیورٹی فورسز دہشتگردی کی لعنت کے خاتمے کے لیے پُرعزم ہیں ، جوانوں کی قربانیاں ہمارے عزم کو مزید تقویت دیتی ہیں۔
کیپٹن حسین جہانگیر شہید نے 4 سال تک پاک فوج میں خدمات سر انجام دیں اور سوگواران میں والدین اور بہن بھائی چھوڑے۔ حوالدار شفیق اللہ شہید نے 18 سال تک پاک فوج میں خدمات سر انجام دیں اور سوگواران میں اہلیہ، ایک بیٹا اور 2 بیٹیاں چھوڑے۔
