چینی کی برآمد سے متعلق معاملات کا جائزہ لینے کیلئے اپنی زیر صدارت اجلاس سے خطاب کرتے ہوئے شہباز شریف نے کہا کہ اقتصادی رابطہ کمیٹی چینی کے اسٹاک اور عالمی مارکیٹ کا جائزہ لے، شوگر ملز پورا سال 140 روپے ایکس فیکٹری قیمت پر فراہمی کی یقین دہانی کرائیں۔
اجلاس میں چینی کی برآمد سے متعلق معاملات کا جائزہ لیا گیا اور وزیرِ اعظم کو بریفنگ دیتے ہوئے بتایا گیا کہ چینی برآمد نہ ہوئی تو آئندہ سیزن میں شوگر ملز دیوالیہ ہو جائیں گی اور 40 ملز بند ہو جائیں گی۔
بریفنگ میں بتایا گیا کہ شوگر ملز نے رواں سیزن گنے کے کاشتکاروں کو 800 ارب روپے میں سے 760 ارب روپے ادا کیے ہیں، شوگر ملز نے رواں سیزن کاشت کاروں کو اب بھی 40 ارب روپے ادا کرنا ہیں۔
بریفنگ میں بتایا گیا کہ چینی برآمد نہ ہوئی تو شوگر ملز نومبر میں کرشنگ نہیں کر سکیں گی، ملک میں 15 لاکھ ٹن اضافی چینی موجود ہے، 5 لاکھ ٹن چینی برآمد کرنے سے 26 کروڑ ڈالر حاصل ہوں گے۔
