جسٹس ریٹائرڈ مقبول باقر نے سپریم کورٹ کا ایڈہاک جج کی ذمہ داری لینے سے معذرت کرلی۔
انہوں نے اپنے ایک حالیہ بیان میں ایڈہاک جج بننے سے معذرت کرتے ہوئے وضاحت کی ہے۔ انہوں نے کہا ہے کہ ایڈہاک جج کی پیشکش سے معذرت ذاتی وجوہات کی بنا پر کی ہے۔
جسٹس (ر) مقبول باقر کا کہنا ہے کہ ایڈہاک ججز کی تعیناتی آئینی ہے، ایڈہاک جج کے معاملے پر ہونے والی تنقید بلاجواز ہے۔
خیال رہے کہ سپریم کورٹ میں ایڈہاک ججز کی تعیناتی کے لیے جوڈیشل کمیشن کا اجلاس 19 جولائی کو طلب کیا گیا ہے۔ جوڈیشل کمیشن میں ایڈہاک ججز کیلئے 4 ناموں پرغور ہوگا۔
چیف جسٹس نے ایڈہاک ججز کے لیے جسٹس ریٹائرڈ مشیرعالم، جسٹس ریٹائرڈ مقبول باقر کے نام نامزد کے ہیں جبکہ دیگر ججز میں جسٹس ریٹائرڈ مظہر عالم میاں خیل اور جسٹس ریٹائرڈ سردار طارق مسعود کے نام بھی شامل ہیں۔
