موبائل فون سروس صرف جلوس اور مجالس والے علاقوں میں بند رہے گی

لاہور: نویں اور دسویں محرم الحرام کو سیکیورٹی اور امن و عامہ کی صورتحال کے پیش نظر موبائل سروس بند رکھنے سے متعلق فیصلہ ہو گیا۔

سیکرٹری داخلہ پنجاب کے مطابق لاہور میں محرم الحرام کے دوران موبائل فون سروس بند نہیں ہو گی۔ موبائل سروس صرف جلوس اور مجالس والے علاقوں میں ہی معطل کرنے کی سفارش کی گئی ہے۔

انہوں نے کہا کہ کسی بھی شہر میں مکمل طور پر موبائل سروس معطل نہیں کی جائے گی۔ اکثریتی اضلاع میں 9 اور 10 محرم کو صبح 8 بجے سے رات 10 بجے تک جزوی طور پر موبائل سروس بند رہے گی۔

لاہور، قصور، شیخوپورہ، سرگودھا، خوشاب، سیالکوٹ، اٹک، جہلم اور چکوال میں موبائل فون سروس بند نہیں ہو گی۔ اس کےعلاوہ ملتان، خانیوال، لودھراں، وہاڑی، ساہیوال، پاکپتن، اوکاڑہ اور چنیوٹ میں موبائل سروس بحال رہے گی۔

گوجرانولہ، نارووال اور ٹوبہ ٹیک سنگھ اور بھکر میں جزوی طور پر موبائل سروس معطل ہو گی۔ منڈی بہاوالدین، وزیر آباد اور راجنپور میں بھی جزوی طور پر موبائل سروس بند ہو گی۔

یہ بھی پڑھیں: 

فیصل آباد، بہاولنگر اور حافظ آباد میں بھی جزوی طور پر موبائل سروس معطل ہو گی۔ راولپنڈی میں 28 مقامات، رحیم یار خان 15، میانوالی اور بہاولپور میں 11 پر موبائل سروس معطل رہے گی۔ لیہ میں 10، مظفرگڑھ میں 7 اور ننکانہ صاحب میں 6 مقامات پر موبائل فون سروس بند رہے گی۔

جن علاقوں میں موبائل سروس کی بندش نویں اور دسویں محرم الحرام کو ہو گی ان میں راولپنڈی، فیصل آباد، جھنگ، بہاولپور اور بہاولنگر کے چند علاقے شامل ہیں۔

محکمہ داخلہ پنجاب کے مطابق امن و امان کے قیام اور شہریوں کی حفاظت کے لیے مخصوص مقامات پر موبائل سروس معطل کرنے کا فیصلہ کیا گیا۔