ڈائریکٹر محکمہ موسمیات اختر محمود نے کہا ہے کہ مغربی ہواؤں کا سلسلہ 22 اکتوبر سے ملک میں داخل ہو گا۔ اور 22 اکتوبر سے شمالی علاقہ جات میں بارشوں کے امکانات ہیں۔
انہوں نے کہا کہ مغربی ہوائیں ملک میں داخل ہونے کے باعث موسم مزید بہتر ہو جائے گا۔ شمالی علاقہ جات کے علاوہ چند ایک مقامات پر بادل برسنے کا امکان ہے۔
محکمہ موسمیات کے مطابق اسلام آباد اور گردونواح میں منگل کو موسم خشک رہنے کا امکان ہے۔ جبکہ لسبیلہ، گوادر، جیوانی، کیچ ، تربت اور آواران کے چند مقامات پر بارش ہو سکتی ہے۔ تاہم بلوچستان کے بیشتر اضلاع میں موسم گرم اور خشک رہے گا۔
یہ بھی پڑھیں:
سندھ کے علاقوں مٹھی، بدین، دادو، کراچی، ٹھٹھہ، سجاول اور حیدرآباد میں بھی بادل برسنے کا امکان ہے۔ چترال اور دیر میں چند مقامات پر گرج چمک کے ساتھ بارش ہو سکتی ہے۔
گلگت بلتستان میں چند مقامات پر بارش کا امکان ہے تاہم آزاد کشمیر میں موسم خشک اور سرد رہے گا۔
