وزیر اعظم شہباز شریف نے کہا ہے کہ اپنے وسائل کیلئے ٹیکس اکٹھا کر لیں تو ہمیں آئی ایم ایف کے پاس جانے کی ضرورت نہ پڑے۔
ایف بی آر ہیڈ کوارٹرز کے دورے کے موقع پر اجلاس سے خطاب کرتے ہوئے شہباز شریف کا کہنا تھا کہ ہم نے ملکی معیشت کو مستحکم کرنا ہے، آئی ایم ایف پروگرام کو آخری پروگرام تصور کرنا ہے۔
انہوں نے کہا کہ آئی ایم ایف سے سٹاف لیول کا معاہدہ ہو چکا ہے، آئی ایم ایف کا ایگزیکٹو بورڈ معاہدے کی منظوری دے گا، ہم نے آئی ایم ایف سے جان چھڑانی ہے، معاہدے پر وفاقی وزیر خزانہ سمیت پوری ٹیم کو خراج تحسین پیش کرتا ہوں۔
شہباز شریف کا کہنا تھا کہ ٹیکس کے نظام میں کمزوریوں سے جان چھڑانا ہو گی، ایف بی آر کو ٹیکس نیٹ بڑھانے کیلئے جس بھی سپورٹ کی ضرورت ہو گی، ترجیحی بنیادوں پر کی جائے گی۔
انہوں نے کہا کہ کوئی ذاتی ایجنڈا نہیں، میرامقصد صرف قومی مفاد ہے، قومی مفاد کو آگے لے کرچلیں گے۔
