میڈیا رپورٹ کے مطابق ایشیائی ترقیاتی بینک نے ڈیویلپمنٹ آؤٹ لک رپورٹ جاری کردی، اس رپورٹ میں پاکستان میں رواں مالی سال معاشی شرح نمو 1.9 فیصد رہنے کا تخمینہ لگایا گیا، اے ڈی بی نے پاکستان میں رواں مالی سال اوسط مہنگائی 25 فیصد رہنے کی پیشگوئی بھی کی ہے۔
اس کے علاوہ رپورٹ میں پڑوسی ملک بھارت میں رواں مالی سال مہنگائی 4.6 فیصد جبکہ بنگلہ دیش میں 8.4 اور بھوٹان میں مہنگائی 4.5 فیصد رہنے کا امکان ظاہر کیا گیا ہے۔
رپورٹ کے مطابق رواں مالی سال مالدیپ میں مہنگائی 3.2، نیپال میں 6.5 اور سری لنکا میں مہنگائی 7.5 فیصد رہنے کی توقع ہے۔
رپورٹ میں بتایا گیا کہ رواں مالی سال بھارت میں معاشی شرح نمو 7 فیصد، بنگلہ دیش میں معاشی شرح نمو 6.1 فیصد رہنے کا امکان ہے جبکہ پاکستان کی معاشی شرح نمو انڈونیشیا، ملایشیا اور فلپائن سے کم رہنے کا تخمینہ لگایا گیا ہے۔
ڈیویلپمنٹ آؤٹ لک رپورٹ کے مطابق سنگا پور،تھائی لینڈ، ویت نام سے بھی پاکستان کی معاشی شرح نمو کم رہنے کی توقع ہے اس کے علاوہ رواں مالی سال سری لنکا کی معاشی شرح نمو پاکستان کے برابر یعنی 1.9 فیصد رہنے کا امکان ہے۔
اے ڈی بی نے بتایا کہ آئندہ برس پاکستان کی معاشی شرح نمو 2.8 فیصد تک رہنے کا امکان ہے، آئندہ برس پاکستان میں سیاسی استحکام نظر آرہا ہے، آئندہ برس پاکستان میں مہنگائی کم ہو کر 15 فیصد تک رہنے کی بھی توقع ہے۔
رپورٹ میں کہا گیا کہ پاکستان میں معاشی اصلاحات کے نتائج سامنے آ رہے ہیں، معاشی استحکام کے لیے اصلاحات پر عملدرآمد نا گزیر ہے، پاکستان کی معیشت میں بتدریج بہتری آ رہی ہے، زراعت اور مینوفیکچرنگ کے شعبے کی پیداوار بڑھ رہی ہے۔
