بھارتی ایتھلیٹ نیرج چوپڑا کی والدہ نے پیرس اولمپکس میں جیولین تھرو میں گولڈ میڈل حاصل کرنے پر پاکستانی ایتھلیٹ ارشد ندیم کو اپنا بیٹا قرار دے دیا۔
پیرس اولمپکس 2024 کے جیولین مقابلے میں نیرج چوپڑا کے سلور میڈل جیتنے کے بعد بھارتی میڈیا سے گفتگو کرتے ہوئے انہوں نے اپنے بیٹے کی جیت پر خوشی کا اظہار کیا۔
والدہ سروج دیوی کا کہنا تھا کہ ‘ہم بہت خوش ہیں، ہمیں تو سلور بھی گولڈ کے برابر لگ رہا ہے، جس کو گولڈ میڈل ملا ہے وہ بھی ہمارا لڑکا ہے۔ ہر کوئی بہت محنت کرنے کے بعد وہاں جاتا ہے۔‘
انہوں نے مزید کہا کہ ‘نیرج زخمی تھا، مگر ہم بچے کی پرفارمنس سے خوش ہیں۔ میں اپنے بچے کے لیے اس کی پسندیدہ ڈش بناؤں گی۔’
اس موقع پر نیرج چوپڑا کے والد کا کہنا تھا کہ مجھے میرے بیٹے کی پرفارمنس پر فخر ہے، آج پاکستان کا دن تھا۔ انہوں نے نیرج چوپڑا کی انجری کو ہار کی وجہ قرار دے دیا ہے۔
