ہم نیوز کے پروگرام ”فیصلہ آپ کا عاصمہ شیرازی کیساتھ” میں گفتگو کرتے ہوئے خواجہ آصف نے کہا کہ پی ٹی آئی 9مئی کی کبھی اونرشپ لیتی ہےتو کبھی ڈس اون کر دیتی ہے،اب ان کی طرف سے کہا جارہا ہے کہ 9مئی ہم نے نہیں بلکہ کسی اور نے کیا ہے۔
انہوں نے کہا کہ 9مئی کے سارے کردار اسکرین پر نظرآئے ہیں،یہ خود ہی بتا دیں کہ اگر یہ لوگ پی ٹی آئی کے نہیں تو کس کے ہیں؟ جس نے کور کمانڈر کی یونیفارم پہن کر نعرے لگائے وہ کون تھے؟۔
جنہوں نے شہدا کے مجسمے توڑے، جولوگ جناح ہائوس میں داخل ہوئے وہ کون لوگ تھے، سابق چیئرمین پی ٹی آئی نے اعتراف جرم کیا ہوا ہے جو ریکارڈ پر ہے۔
وفاقی وزیر دفاع نے کہا کہ فوج نے اپنے ادارے کے اندرجو کارروائی کرنی تھی کر دی ہےلیکن جنہوں نے یہ پلان بنا یا ہے ان کیخلاف تو اب تک کوئی کارروائی نہیں ہوئی ۔
خواجہ آصف نے کہا کہ سیاست میں لوگ اپنے آپ کو پروٹیکٹ کرتے ہیں، ساری دنیا میں پارٹیز اپنی کارکردگی کے اوپر سیاست کرتی ہیں، یہ اپنی 4 سال کی کارکردگی ہی بتا دیں،10سال میں انہوں نے خیبر پختونخوا میں بھی حکومت کی اس کی کارکردگی ہی بتا دیں۔
وفاقی وزیر کا مزید کہنا تھا کہ سابق چیئرمین پی ٹی آئی سے یہ پوچھا جائے کہ امپائر کون ہے؟ ہم سیاسی لوگ ہیں، بات چیت کے دروازے بند نہیں کرتے، اگر پی ٹی آئی سے کوئی گفتگو ہونی ہے توا س میں سرفہرست 9مئی ہوگا۔
