وزیراعلیٰ خیبر پختونخوا علی امین گنڈاپور نے عدالتی احکامات پر گرفتاری سے بچنے کے لیے پشاور ہائیکورٹ سے رجوع کر لیا۔
گزشتہ روز ڈسٹرکٹ اینڈ سیشن کورٹ اسلام آباد کی جج شائستہ خان کنڈی نے اسلحہ و شراب برآمدگی کیس میں مسلسل غیر حاضری پر علی امین گنڈا پور کے ناقابلِ ضمانت وارنٹ گرفتاری جاری کیے تھے۔
سیشن کورٹ نے ایس ایچ او بہارہ کہو کو حکم دیتے ہوئے وزیراعلیٰ کو گرفتار کر کے عدالت میں پیش کرنے کا کہا تھا۔ عدالتی احکامات کے باوجود علی امین گنڈا پور کو آج عدالت میں پیش نہ کیا جا سکا۔
اس حوالے سے علی امین گنڈاپور نے جوڈیشل مجسٹریٹ کے فیصلے کے خلاف راہداری ریمانڈ کے لیے پشاور ہائیکورٹ سے رجوع کر لیا ہے۔ وزیراعلیٰ گنڈاپور نے جوڈیشل مجسٹریٹ کےآرڈر کے خلاف سیشن عدالت اسلام آباد سے بھی رجوع کیا ہے۔
وزیراعلیٰ کے پی نے درخواست میں مؤقف اختیار کیا ہے کہ اسلحہ و شراب برآمدگی کے مقدمے میں بریت کی درخواست زیر التوا ہے۔ درخواست میں استدعا کی گئی ہے کہ ناقابل ضمانت وارنٹ گرفتاری کو کالعدم قرار دیا جائے۔
