ہم نیوز کے پروگرام ”فیصلہ آپ کا عاصمہ شیرازی کیساتھ” میں گفتگو کرتے ہوئے شعیب شاہین کا کہنا تھا کہ پی ٹی آئی کا پرسوں اسلام آباد میں ترنول کے مقام پر جلسہ ہے جس کی آج اجازت ملی ہے، اس جلسے کیلئے پچھلے کئی مہینوں سےانتظامیہ کےدفاترکے چکر لگا رہےتھے۔ رہنما تحریک انصاف نے کہا کہ عامرمغل کو گرفتار کیا گیا مگر فی الحال ابھی تک یہ پتہ نہیں کونسے مقدمے میں انہیں گرفتار کیا گیا ہے۔
یاد رہے کہ پی ٹی آئی اسلام آباد کے صدر عامر مغل کو ایک بار پھر ڈی سی آفس کے باہر سے گرفتار کیا گیا ہے ۔ عامر مغل کی گرفتاری کی پی ٹی آئی کے وکیل عاصم بیگ کی جانب سے تصدیق کر دی گئی تھی ۔ واضح رہے کہ مئی کے مہینے میں بھی عامر مغل کو گرفتار کیا گیا تھا۔
قبل ازیں پاکستان تحریک انصاف کی 6 جولائی کو اسلام آباد میں ترنول کےمقام پر جلسے کی تیاریاں تیزی سے جاری ہیں، پارٹی قیادت نے صوبہ پنجاب کے تمام کارکنان کو جلسے میں شرکت کو یقینی بنانے کی اپیل کر دی۔
رہنما تحریک انصاف شوکت بسرا نے میڈیا سے گفتگو کرتے ہوئے کہا کہ ہم اسلام آباد میں تاریخ کا سب سے بڑا سیاسی پاور شو کرنے جارہے ہیں ۔ جس کیلئے لاہور سمیت پنجاب بھر سے کارکنان کو شرکت کی کال دی ہے۔
سیکرٹری اطلاعات پی ٹی آئی پنجاب کا کہنا تھا کہ بہت عرصے بعد پاکستان تحریک انصاف (پی ٹی آئی )کو جلسے کی اجازت ملی ہے، جلسے میں عوام کا ٹھاٹھیں مارتا ہوا سمندر ہوگا۔
دوسری جانب اسلام آباد کی ضلعی انتظامیہ نے پاکستان تحریک انصاف کو 6 جولائی کو ترنول اسلام آباد میں جلسہ کرنے کی اجازت دے دی ہے ۔ اسلام آباد ہائیکورٹ کے جسٹس بابر ستار نے پی ٹی آئی کو اسلام آباد میں جلسے کی اجازت دینے سے متعلق درخواست پر سماعت کی ،اسٹیٹ کونسل نے عدالت کو بتایا کہ پی ٹی آئی کو ترنول چوک کے پاس 6 جولائی کو جلسے کی اجازت دے دی ہے۔
بعد ازاں اسلام آباد ہائی کورٹ نے این او سی جاری ہونے پر پی ٹی آئی رہنما عامر مغل کی درخواست نمٹا دی۔ گزشتہ روز تحریک انصاف کے رہنما عمر ایوب نے کہا تھا کہ 6 جولائی کو اسلام آباد میں تاریخی جلسہ کریں گے ، انہوں نے کہا تھا کہ جلسہ عمران خان کی رہائی کے لیے اور مہنگائی کے خلاف ہو گا۔
