مسالے دار غذاؤں کا استعمال انسانی صحت اور معدے کے لیے نہایت نقصان دہ ہے جس کا نتیجہ پیٹ میں گیس اور تیزابیت کی صورت میں سامنے آتی ہے۔
ماہرین صحت کے مطابق غذاؤں میں بکرے اور گائے کا گوشت، مرغن، مسالے دار غذائیں، بیج جیسے کہ السی، اجوائن، خشک میوہ جات بھی تیزابیت اور معدے میں گیس کا سبب بنتے ہیں۔
گیس اور تیزابیت کی وجہ سے اکثر طبعیت میں بے چینی کی وجہ بنتی ہے اور طبعیت ناساز ہونے کا براہ راست اثر آپ کے مزاج پر پڑتا ہے۔
بہت زیادہ گیس پیٹ میں درد یا سوزش کی وجہ بن جاتی ہے، اکثریت اس مسئلے سے چھٹکارا حاصل کرنے کیلئے ادویات کا استعمال کرتی ہے جو انسانی جسم کیلئے مُضر ہے۔ تاہم طبی ماہرین کا کہنا ہے کہ اس مسئلے کو گھریلو نسخوں سے دور کرنا زیادہ مؤثر ہے۔
علاج سے پہلے آپ کو یہ سوچنا ہوگا گیس کے مسائل کی بڑی وجہ کیا ہے؟ یہ جاننے کیلئے مندرجہ ذیل وجوہات اور اسباب کو سمجھنا ہوگا۔
گیس پیدا کرنے والی غذائیں جیسے پھلیاں، گوبھی اور کاربونیٹڈ مشروبات کا استعمال کرنا۔ معدے کے حالات جیسے لیکٹوز عدم برداشت یا آنتوں کا سنڈروم (آئی بی ایس)
اس کے علاوہ تناؤ(اسٹریس) اور اضطراب(انزائٹی) ہاضمے کے عمل کو متاثر کرتے ہیں اور گیس کی وجہ بنتے ہیں۔
بیکنگ سوڈا اور لیموں کا رس
طبی ماہرین کے مطابق بیکنگ سوڈا اور لیموں کا رس گیس کے مسائل دور کرنے کیلئے ایک بہترین گھریلو علاج ہے۔
بیکنگ سوڈا سینے کی جلن اور بدہضمی کو کم کرتا ہے جو گیس کا باعث بنتے ہیں جبکہ لیموں کا رس سوزش اور گیس کو کم کرتا ہے۔
ایک گلاس پانی میں آدھا چائے کا چمچ بیکنگ سوڈا اور آدھا لیموں کا رس ملائیں، اچھی طرح مکس کرنے کے بعد اس کو پی لیں۔
واضح رہے کہ اس مشروب کو ضرورت سے زیادہ استعمال نہ کیا جائے کیونکہ بیکنگ سوڈا اور لیموں کے رس کا زیادہ استعمال مختلف ضمنی اثرات کا باعث بن سکتا ہے۔
سونف
کچھ ماہرین کی رائے ہے کہ کھانے کے بعد کچھ مقدار میں سونف چبانا معدے میں تیزابیت کی روک تھام میں مدد دیتا ہے۔ سونف کی چائے غذائی نالی کو صحت مند رکھتی ہے جبکہ یہ مشروب بدہضمی اور پیٹ پھولنے کے خلاف بھی فائدہ مند ہے۔
دار چینی
یہ مصالحہ معدے کی تیزابیت کے خلاف کام کرتا ہے اور معدے کی صحت ہاضمے اور غذا کو جذب کرنے میں مدد دے کر کرتا ہے۔ معدے میں تیزابیت کو دور کرنے کے لیے دار چینی کی چائے مفید ثابت ہوتی ہے۔
لونگ
لونگ قدرتی طور پر غذائی نالی میں گیس کو پیدا ہونے سے روکتی ہے، الائچی اور لونگ کو کچل کر کھانا بھی معدے میں تیزابیت کا علاج کرتا ہے اور سانس کی بو سے بھی نجات دلاتا ہے۔
زیرہ
زیرہ بھی معدے میں تیزابیت کو معمول پر رکھنے میں مددگار مصالحہ ہے جو کہ ہاضمے میں مدد دینے کے ساتھ پیٹ کے درد کو بھی کم کرتا ہے۔ ایک چائے کا چمچ زیرہ ایک کپ ابلتے ہوئے پانی میں ڈال کر ہر کھانے کے بعد کھانا عادت بنالیں۔
