رواں مالی سال کی پہلی سہ ماہی کے دوران پاکستان میں چین سے 404 ملین ڈالر کی براہ راست غیر ملکی سرمایہ کاری (ایف ڈی آئی) آئی۔ جس میں صرف ستمبر میں 224.8 ملین ڈالر کا نمایاں حصہ رہا۔
گزشتہ سہ ماہی ملک کو مختلف ممالک سے مجموعی طور پر 903.5ملین ڈالر کی براہ راست سرمایہ کاری موصول ہوئی۔ جس میں چین سرفہرست رہا۔ جو مجموعی طور پر 44.8 فیصد ہے۔
ہانگ کانگ نے اس عرصے کے دوران پاکستان کی ایف ڈی آئی میں 101.7 ملین ڈالر کا حصہ ڈالا۔ جبکہ دیگر اہم سرمایہ کاری برطانیہ سے آئی۔ جس نے 79.8 ملین ڈالر کی سرمایہ کاری کی۔
سوئٹزرلینڈ 32.9 ملین ڈالر اور سویڈن کا 30 ملین ڈالر تعاون کر رہا۔ جبکہ متحدہ عرب امارات نے 25.5 ملین ڈالر کا اضافہ کیا۔ ایف ڈی آئی کا بقیہ حصہ مختلف دوسرے ممالک سے آیا تھا۔
یہ بھی پڑھیں:
ستمبر میں چین نے سب سے بڑے سرمایہ کار کی حیثیت سے اپنی حیثیت کا اعادہ کیا۔ جس نے 224.8 ملین ڈالر کا حصہ ڈالا۔ جو اس مہینے کیلئے تمام شراکت دار ممالک سے موصول ہونے والے کل 414.6 ملین ڈالر کا 44.7 فیصد ہے۔
اس کے مقابلے میں گزشتہ مالی سال کی پہلی سہ ماہی میں چین سے براہ راست غیر ملکی سرمایہ کاری 163.9 ملین ڈالر رہی۔ حالیہ اضافے سے رواں مالی سال کے دوران پاکستان میں چینی سرمایہ کاری میں 164 فیصد اضافہ ہوا۔
شعبے کے لحاظ سے توانائی کے شعبے میں سب سے زیادہ 416.3 ملین ڈالر کی سرمایہ کاری ہوئی۔ جس میں سے ہائیڈل پاور نے 334.4 ملین ڈالر، کوئلے نے 55.9 ملین ڈالر اور تھرمل پاور نے 25.9 ملین ڈالر حاصل کیے۔
ایف ڈی آئی کی یہ زبردست آمد پاکستان کے معاشی منظرنامے کے لیے ایک مثبت اشارہ ہے۔ جو بین الاقوامی سرمایہ کاروں کے لیے ملک کی بڑھتی ہوئی اپیل اور سرمایہ کاروں کو فراہم کی جانے والی سہولیات کو اجاگر کرتی ہے۔
