ممبئی (این این آئی)بالی ووڈ ڈانسر اور ارباز خان کی سابق اہلیہ ملائکہ اروڑہ نے ممبئی میں ریسٹورنٹ کھول لیا۔اداکارہ ملائکہ اروڑا نے ممبئی کے علاقے باندرہ میں نئے ریسٹورنٹ اسکارلٹ ہائوس کیساتھ ہوٹل کی صنعت میں قدم رکھ دیا ہے، یہ ریسٹورنٹ 90سالہ قدیم پرتگالی طرز کے گھر میں قائم کیا گیا ہے،ریسٹورنٹ کھولنے کیلئے ملائکہ نے بیٹے ارحان خان، ان کے دوست ملایا ناگپال اور ہوٹل مینجمنٹ کے ماہر دھول ادیشی کیساتھ تعاون کیا ہے۔
ملائکہ نے بزنس کی دنیا میں نئے منصوبے کا اعلان انسٹاگرام پر تصویر کے ذریعے کیا جس میں وہ اور ان کے بیٹے ارحان ایک جیسی سیاہ جیکٹس پہنے دکھائی دے رہے ہیں جس پر اسکارلٹ ہائوس لکھا ہوا ہے۔ملائکہ نے پوسٹ کیپشن میں لکھا پہلی بار ایک ساتھ تعاون کرتے ہوئے۔اداکارہ کو ان کے دوستوں اور خاندان کی جانب سے انسٹاگرام پر مبارکباد کے پیغامات موصول ہو رہے ہیں۔ کرینہ کپور نے اپنی انسٹاگرام اسٹوری پر ملائکہ کو مبارکباد پیش کرتے ہوئے لکھا مبارک ہو ملائکہ اور ارحان، یہاں کھانے کیلئے آنے کا انتظار نہیں کر سکتی۔میڈیا سے گفتگو میں ملائکہ نے کہاکہ اس ریسٹورنٹ کے ذریعے ایک ایسا ماحول تخلیق کرنا چاہا ہے جہاں لوگ آرام سے بیٹھ سکیں۔ انہوں نے کہا کہ کھانے اور مہمان نوازی کے شوق نے مجھے اور بیٹے کو اس پراجیکٹ پر کام کرنے کیلئے مجبور کیا۔
