0

پاکستان نے نیوزی لینڈ کو شکست دے کر سیریز برابر کردی

پاکستان نے نیوزی لینڈ کو پانچویں ٹی 20 میں9 رنز سے شکست دے کر سیریز 2-2 سے برابر کردی۔

قذافی اسٹیڈیم میں کھیلے گئے پانچویں ٹی 20 میچ میں پاکستان کی جانب سے دیے گئے 179 رنز کے تعاقب میں کیوی ٹیم آخری اوور میں 168 رنز پر آل آؤٹ ہوگئی۔

ٹم سائفرٹ کی 52 رنز کی جارحانہ اننگز رائیگاں گئیں، جوش کلارکسن نے 26 گیندوں پر 38 رنز بناکر نمایاں رہے۔

کپتان مائیکل بریسویل 23 رنز بناسکے، مارک چیپمن 12 رنز بنا کر اسامہ میر کو وکٹ دے بیٹھے، ٹام بلنڈل کو 4 رنز پر شاہین آفریدی نے بولڈ کیا۔

پاکستان کی جانب سے شاہین شاہ آفریدی نے 4 کھلاڑیوں کو پویلین کی راہ دکھائی، اسامہ نے دو، شاداب خان اور عماد وسیم نے ایک، ایک وکٹ حاصل کی۔

اس سے قبل پاکستان نے مقررہ اوورز میں 5 وکٹوں کے نقصان پر 178 رنز بنائے تھے اور نیوزی لینڈ کو جیت کے لیے 179 رنز کا ہدف تھا۔

کپتان بابر اعظم نے 69 رنز کی شاندار اننگز کھیلی، ان کی اننگز میں 6 چوکے اور 2 چھکے شامل تھے، فخر زمان 43 رنز کے ساتھ نمایاں رہے۔

اوپنر صائم ایوب ایک رن بنا کر رورکی کا نشانہ بنے، عثمان خان 31 رنز بنا کر ایش سودھی کو وکٹ دے بیٹھے۔

افتخار احمد کو 6 رنز پر نیشم نے آؤٹ کیا، شاداب خان 15 رنز بناکر ناٹ آؤٹ رہے۔

نیوزی لینڈ کی جانب سے ولیم رورکی، جمی نیشم، ایش سودھی اور بین سیئرز نے ایک، ایک وکٹ حاصل کی۔

اس سے قبل نیوزی لینڈ کے کپتان مائیکل بریسویل نے ٹاس جیت کر پاکستان کو پہلے بیٹنگ کی دعوت دی تھی۔

قومی ٹیم میں ایک تبدیلی کی گئی، زمان خان کی جگہ شاہین آفریدی کو شامل کیا گیا تھا۔

بابر اعظم کا کہنا تھا کہ ٹاس جیت جاتے تو ہم بیٹنگ ہی کرتے، کوشش کریں گے 180 سے 190 رنز بنائیں۔

کیوی کپتان ٹام بریسویل کا کہنا تھا کہ امید کرتے ہیں کنڈیشن گزشتہ میچ کی طرح رہیں گی، نیوزی لینڈ کی ٹیم میں تین تبدیلیاں کی گئی ہیں۔

واضح رہے کہ پانچ ٹی 20 میچز کی سیریز میں نیوزی لینڈ کو 2-1 کی برتری حاصل ہے جبکہ پہلا میچ بارش کی نذر ہوگیا تھا۔

Comments

اس خبر پر اپنی رائے کا اظہار کریں

Leave a Reply