لاہور ( این این آئی) لاہور کے علاقہ ڈیفنس میں سیلون مالک خاتون پر فائرنگ کا واقعہ نیا رخ اختیار کرگیا۔سابقہ پاکستانی اداکارہ و ماڈل زینب جمیل نے اپنے اوپر قاتلانہ حملے کا الزام اپنے شوہر پر عائد کردیا۔انہوں نے کہا کہ شوہر نے مجھے قتل کروانے کی کوشش کی ہے، وہ گزشتہ دو ماہ سے مجھے دھمکیاں دے رہا تھا لیکن میں دھمکیوں کو خاطر میں نہیں لائی کیونکہ مجھے لگا کہ میرے بچوں کا باپ میرے ساتھ ایسا نہیں کرسکتا۔زینب جمیل نے پولیس کی تفشیش پر بھی عدم اعتماد کا اظہار کر دیا ہے۔
انہوں نے ویڈیو جاری کرتے ہوئے کہا کہ ہسپتال سے ویڈیو ریکارڈ کررہی ہوں ، مجھے دوبارہ دھمکیاں مل رہی ہیں ، ملزم کو تاحال گرفتار نہیں کیا جاسکا ، پولیس مجھے سکیورٹی فراہم کرے۔ زینب جمیل نے آئی جی پولیس سے کہا کہ وہ خود اس کیس کا نوٹس لیں اور ملزم کو گرفتار کروائیں۔واضح رہے کہ زینب جمیل کو چند روز قبل ڈیفنس میں ان کے بیوٹی سیلون کے سامنے دو نامعلوم موٹر سائیکل سوار ملزمان نے چھ گولیاں مار دی تھیں۔
