بالی ووڈ کے سینیئر اور نامور اداکار پریش راول نے بھارتی حکومت سے ووٹ نہ ڈالنے والوں کو سزا یا ٹیکس بڑھانے کی اپیل کی ہے۔
گزشتہ روز بھارتی اداکار پریش راول لوک سبھا انتخابات میں اپنا ووٹ کاسٹ کرنے ممبئی پہنچے۔ اس موقع پر میڈیا سے گفتگو کرتے ہوئے انہوں نے بھارتی شہریوں کو ووٹ ڈالنے کی اہمیت سے متعلق آگاہ کیا۔
پریش راول کا کہنا تھا کہا لوگ شکایت کرتے ہیں کہ حکومت کام نہیں کر رہی لیکن اگر وہ آج ووٹ نہیں ڈالیں گے تو اس ملک کے حالات کی ذمہ دار حکومت نہیں بلکہ عوام خود ہوں گے۔
بھارتی اداکار نے مزید کہا کہ جو لوگ ووٹ نہیں ڈالتے ان کے خلاف کوئی نہ کوئی کارروائی ہونی چاہیے یا ان کے ٹیکس بڑھائیں یا پھر اُنہیں کوئی سزا دیں۔
خیال رہے کہ بھارت میں دنیا کے سب سے طویل مدتی انتخابات کے پانچویں مرحلے کا سلسلہ جاری ہے جس میں بھارتی شہریوں سمیت اداکاروں کی بڑی تعداد میں حصہ ڈالتی دکھائی دے رہی ہے۔
اس سے قبل بالی ووڈ کے معروف اداکار شاہ رخ خان، سلمان خان اور اکشے کمار بھی ووٹ ڈالنے پہنچے تو مداحوں سے بھی ووٹ ڈالنے کی اپیل کی۔
لوک سبھا انتخابات کے اگلے مرحلے کا آغاز 25 مئی سے ہوگا جبکہ حتمی نتائج کا اعلان 4 جون کو کیا جائے گا۔
