جنوبی افریقہ کے سابق کپتان اے بی ڈیولیرز نے بابر اعظم کی انگریزی کا مذاق اڑانے والے بھارتی صارف کو خاموش کروادیا۔
ورلڈ کپ میں پاکستان کے پہلے میچ سے قبل اے بی ڈیولیرز اپنے یوٹیوب چینل پر کپتان بابر اعظم سمیت دیگر کرکٹرز کے انٹرویوز کیے جس میں ان سے ورلڈ کپ کی تیاریوں اور کیریئر سے متعلق پوچھا گیا۔
تاہم ریتھک گوروو نامی صارف نے کمنٹ کیا ‘اے بی، بابر اعظم کی انگلش سننے کے بعد بمشکل ہی اپنی ہنسی قابو کر پارہے ہیں’۔
صارف نے ساتھ ہی قہقہوں والا ایموجی بنایا جس کے بعد اے بی ڈیولیرز نے ریتھک نامی شخص کو کرارا جواب دیا۔
اے بی ڈیویلئیرز نے لکھا ‘بابر کی انگریزی واضح طور پر میری اردو سے بہتر ہے جب کہ ان کی بیٹنگ کی صلاحیت شاندار ہے، اور میں سمجھتا ہوں کہ یہ زیادہ اہم ہے’۔
علاوہ ازیں بابراعظم نے ورلڈکپ میں ٹیم کے بلند حوصلہ اور اعتماد کا اظہار کرتے ہوئے کہا کہ سینئیرز اور جونیئرز کا اچھا کمبینیشن ہے کوشش کریں گے میگا ایونٹ میں اچھے کھیل کا مظاہرہ کریں۔
اے بی ڈیولیرز نے پوچھا کہ کیا وہ 40 سال کی عمر تک کھیلنے کا ارادہ رکھتے ہیں؟
جواب میں بابر اعظم نے کہا کہ سچ کہوں تو مجھے علم نہیں کہ کب تک کھیلوں گا لیکن ابھی اپنے کھیل کو انجوائے کررہا ہوں۔
واضح رہے کہ ورلڈ کپ میں پاکستانی ٹیم اپنا پہلا میچ 6 جون کو میزبان امریکا سے کھیلے گی، 9 جون کو روایتی حریف پاک بھارت ٹیمیں مدمقابل آئیں گی۔
پاکستان اور کینیڈا کے درمیان میچ 11 جون کو کھیلا جائے گا جبکہ گرین شرٹس اپنا آخری گروپ میچ 16 جون کو آئرلینڈ سے کھیلیں گے۔
قومی ٹیم کے 15 رکنی اسکواڈ میں بابر اعظم کپتان، ابرار احمد، اعظم خان، فخر زمان، حارث رؤف، افتخار احمد، عماد وسیم، محمد عباس آفریدی، محمد عامر، محمد رضوان، نسیم شاہ، صائم ایوب، شاہین شاہ آفریدی اور عثمان خان شامل ہیں۔
