بھارت میں شدید گرمی اور ہیٹ اسٹروک کے نتیجے میں انتخابی اہلکاروں سمیت 74 افراد ہلاک ہو گئے۔
بھارتی میڈیا رپورٹس کے مطابق نئی دلی ، پنجاب ، ہریانہ ، چندی گڑھ، یو پی ، مدھیہ پردیش، بہار ، اڑیسہ، اور جھاڑکھنڈ ہیٹ ویو کی لپیٹ میں ہیں۔
گزشتہ 48 گھنٹوں میں ہیٹ اسٹروک سے اموات کی تعداد 74 ہو گئی ہے، جن میں انتخابی عملے کے 25 اہلکار بھی شامل ہیں۔
دوسری جانب بھارتی محکمہ موسمیات نے آج 10 ریاستوں میں ہیٹ ویو کی پیشگوئی کی ہے جبکہ مشرقی بھارت میں موجودہ گرمی کی لہر مزید 2 دن تک جاری رہنے کا امکان ظاہر کیا گیا ہے۔
نئی دہلی میں اس ہفتے ملک کا اب تک کا سب سے زیادہ درجہ حرارت 52.9 ڈگری سینٹی گریڈ ریکارڈ کیا گیا۔ بھارتی حکام نے لوگوں کو بلا ضرورت گھروں سے نہ نکلنے ، سایہ دار جگہوں ہر رہنے اور پانی کا زیادہ سے زیادہ استعمال کرنے کی ہدایات جاری کی ہیں۔
