اسٹیٹ بینک کے مطابق آج کاروبار کےاختتام پر انٹربینک میں ڈالر 1 پیسے کے اضافے کے بعد 278 روپے 39 پیسے کا ہو گیا۔ خیال رہے کہ گزشتہ روز کاروبار کے اختتام پر انٹربینک میں ڈالر 278 روپے 38 پیسے پر بند ہوا تھا۔
دوسری جانب سونے کی قیمت میں اتار چڑھائو جاری ، دو دن سستا ہونے کے بعد سونا ایک بار پھر مہنگا ہو گیا۔
مقامی صرافہ مارکیٹوں میں بدھ کو 24 قیراط کے حامل فی تولہ سونے کی قیمت میں 1100 روپے کا اضافہ ہوا جس کے بعد فی تولہ سونا 2 لاکھ 42 ہزار روپے کا ہو گیا۔
اسی طرح دس گرام سونے کی قیمت 943 روپے کے اضافے سے 2 لاکھ 7 ہزار 476 روپے ہو گئی۔
دوسری جانب بین الاقوامی بلین مارکیٹ میں فی اونس سونا 11 ڈالر کے اضافے سے 2320 ڈالر کی سطح پر آ گیا۔
اس کے برعکس فی تولہ چاندی کی قیمت بغیر کسی تبدیلی کے 2650 روپے اور دس گرام چاندی کی قیمت بھی بغیر کسی تبدیلی کے 2371.94 روپے کی سطح پر مستحکم رہی۔
