پاکستان کرکٹ ٹیم کے کھلاڑیوں نے اپنی نگاہیں آئندہ ماہ ہونے والے آئی سی سی ٹی 20 ورلڈ کپ پر جماتے ہوئے ٹرافی جیتنے کے عزم کا اظہار کیا ہے۔
اے آر وائی نیوز کے مطابق پاکستان کرکٹ ٹیم کے کھلاڑی آئی سی سی ٹی ٹوئنٹی ورلڈ کپ سے قبل آئرلینڈ اور نیوزی لینڈ کے دوروں کے لیے تربیتی کیمپ میں تیاریوں میں مصروف ہیں۔ انہوں نے لاہور میں میڈیا سے گفتگو کرتے ہوئے کہا ہے کہ ورلڈ کپ میں صرف بھارت کے خلاف میچ ہی نہیں بلکہ ہر میچ اہم ہے، ہمارا مقصد ورلڈ کپ جیتنا ہے۔
فاسٹ بولر حارث رؤف نے کہا کہ انجری کے بعد مکمل فٹ ہوں۔ ورلڈ کپ میں بھارت کے خلاف میچ کو سر پر سوار نہیں کریں گے، ہمارا مقصد ورلڈ جیتنا ہے۔
ان کا کہنا تھا کہ محمد عامر کے آنے سے اعتماد میں اضافہ اور ٹیم کو فائدہ ہوگا۔ وہ تجربہ کار بولر ہیں جن سے سیکھنے کا موقع بھی ملے گا۔
محمد عباس آفریدی نے کہا کہ تربیتی کیمپ میں بہت کچھ سیکھنے کو ملا، میں بولنگ کے ساتھ بیٹنگ پر بھی توجہ دے رہا ہوں۔
جارح مزاج اوپنر صائم ایوب نے کہا کہ ٹیم کا ماحول بہت زبردست بنا ہوا ہے۔ کپتان بابر اعظم مجھے بیٹنگ سے متعلق ٹپس بھی دیتے رہتے ہیں۔ بھارت کے خلاف میچ بڑا ہوتا ہے لیکن ورلڈ کپ میں ہر میچ ہی اہم ہوتا ہے۔
بلے باز عثما خان نے کہا کہ ورلڈ کپ میں بھارت سمیت دیگر ٹیمیں بھی آسان ہدف نہیں ہوں گی۔ کرکٹ کھیلتے ہوئے کسی قسم کا پریشر نہیں لیتا۔ قومی ٹیم سے باہر ہونے کے بارے میں سوچا بھی نہیں ہے۔
