0

آلو کی قیمت میں حیرت انگیز اضافے کی وجہ سامنے آ گئی

جدہ: سعودی عرب میں آلو کی قیمت میں حیرت انگیز اضافہ ہوا ہے، اور مختلف وزن رکھنے والی آلو کی تھیلیوں کی قیمت میں واضح فرق آیا ہے۔

عکاظ اخبار کے مطابق سعودی عرب میں آلو 130 فی صد مہنگے ہو گئے ہیں اور ڈھائی سے 3 کلوگرام والی آلو کی تھیلی کی قیمت 5 ریال سے بڑھ کر 12 ریال تک پہنچ گئی ہے۔ ڈیڑھ سے 2 کلو گرام والی آلو کی تھیلی کی قیمت 3 ریال تھی، جو اب 8 ریال میں فروخت کی جا رہی ہے۔

جدہ سبزی منڈی کے تاجروں کے مطابق رواں سیزن میں آلو پیدا کرنے والے علاقوں میں حد سے زیادہ بارشیں ہوئی ہیں، جس کی وجہ سے زیادہ تر فصلیں تباہ ہو گئیں، اور متعدد علاقوں میں آلوؤں کی فصل کو کافی نقصان پہنچا۔

سعودی عرب میں آلو کی کاشت کا ایک بڑا علاقہ حائل ریجن ہے جہاں بیش تر فصلیں زیر آب ہیں، منڈی کے ایک تاجر سلمان الرشیدی کے مطابق اس صورت حال میں کھیتوں سے آلو جمع کرنے میں سخت دشواری پیش آ رہی ہے۔

تاجروں کے مطابق موسم سرما کی آمد پر سبزی مارکیٹ کی صورت حال تبدیل ہو گئی ہے، اور مملکت میں صرف آلو ہی نہیں، دیگر تمام سبزیوں کے نرخ بھی بڑھے ہیں، تاہم آلو کی قیمت ہمیشہ اوپر نیچے ہوتی رہتی ہے۔

تاجر سلمان الرشیدی نے کہا کہ ہول سیل تاجر آلو کی چھوٹی تھیلی ایک ریال میں فروخت کرتے تھے اور عام گاہک کو ڈھائی تا تین ریال میں فروخت کی جاتی تھی، لیکن اب یہ مہنگی ہو چکی ہے۔

Comments

اس خبر پر اپنی رائے کا اظہار کریں

Leave a Reply