عوامی مسلم لیگ کے سربراہ اور سابق وزیر داخلہ شیخ رشید احمد نے کہا ہے کہ آرمی چیف جنرل عاصم منیر سے اپیل کرتا ہوں کہ اس عید پر عام معافی دی جائے۔
اسلام آباد کچہری میں میڈیا سے گفتگو کرتے ہوئے انہوں نے کہا کہ عدالتیں چھوٹی پڑ گئی ہیں اور بے گناہ ملزموں کی تعداد زیادہ ہے، 80 سے 90 فیصد لوگ بے گناہ ہیں۔ میں عالیہ حمزہ اور صنم جاوید کی رہائی کی اپیل کرتا ہوں۔
شیخ رشید کا کہنا تھا کہ فوج کی عزت ہمیں جان سے عزیز ہے لیکن لوگوں میں کیا پیغام جا رہا ہے۔ جو لوگ پچھلی چھوٹی عید پر رہا ہوئے ہیں وہ ایک سال کی قید کاٹنے کے بعد ہوئے۔
سابق وزیر داخلہ نے کہا کہ وقت ہاتھ سے نکلتا جا رہا ہے، جون اہم مہینہ ہے، ملک میں اب سیاسی فیصلے ہوں گے۔
انہوں نے مزید کہا کہ پرویز مشرف دور میں جو میں نے چین کے ساتھ سرمایہ کاری پر دستخط کیے تھے وہ ویسے کے ویسے ہی پڑے ہیں۔ جو سرمایہ کار ہیں وہ ملک چھوڑ کر بھاگ رہے ہیں باہر سے کون آئے گا۔
